24 de set. de 2017

GALICREQUES 2017

En Compostela, entre os días 14 e 22 de outubro, vaise celebrar a XXII edición do Festival Internacional de Títeres "Galicreques 2017"


Ata Santiago chegarán vinte e sete espectáculos doutras tantas compañías de monicreques que se desprazarán desde Arxentina, Brasil, Portugal, Francia, Pol... para ofrecer, a maiores e pequenos, as súas actuacións en diversas prazas, rúas e salas da cidade.

O martes día 17, ás 11.30h. será o Teatro Principal de Compostela o que acolla a representación de "O agasallo de Anya" por Teatro Marionetas Trécola. Trátase dunha función escolar á que poderán asistir todas as nenas e nenos daqueles colexios que así o desexen.


Agardo que moitas persoas poidan gozar da historia de Anya e Xiana e felicito unha vez máis a Teatro Marionetas Trécola por esta oportunidade de participar, por segunda vez con esta obra, nun Festival Internacional de Títeres.


Se queredes acceder ao programa completo desta vixésimo segunda edición, podedes facelo premendo nesta imaxe.



11 de set. de 2017

Na revista EDUGA

Coñecedes a revista galega do ensino Eduga?


Trátase dunha publicación dixital que semestralmente edita a Consellería de Cultura, Educación e Ordenación Universitaria. Pois ben, ao remate do curso 2016-17 saíu á luz o seu número 73 e inclúe, na sección "Innovación", un artigo de María Guerreiro e Pilar García sobre o traballo que elas mesmas desenvolveron hai un par de anos baseándose en "O agasallo de Anya" e que constitúe unha fantástica ferramenta para reforzar e mellorar a comunicación lingüística do alumnado.

Á revista podedes acceder premendo sobre esta imaxe:


E á ferramente elaborada por Pilar e María chegaredes se premedes nestoutra imaxe:


Aínda que o artigo saíu a finais de xuño e aquel non era o momento máis axeitado para poñerse a traballar nisto, espero que lle poidades tirar algún proveito de cara ao curso que estes días comeza.

Grazas!

26 de ago. de 2017

BookCrossing

Ás veces unha atópase con iniciativas ben interesantes... Pasoume este verán en Boiro cando camiñaba por diante do Café AGORA. No exterior da cafetería atopei unha particular lacena con libros e a posibilidade de coller un deles deixando outro de características similares no seu lugar. 
Pareceume tan interesante...!!!




Axiña pensei en "O agasallo de Anya" e en darlle a posibilidade de participar desta experiencia tan atractiva así que, en canto puiden, fíxenme cun exemplar para deixalo xunto aos outros libros agardando que chegue ás mans dalgunha nena ou neno e que poidan gozar coa súa lectura. Sería estupendo saber a onde foi parar...


Parabéns pola iniciativa e... que cunda o exemplo!!! ;)


19 de ago. de 2017

Teatro Marionetas Trécola en Castro

Estamos en pleno mes de agosto, un mes de descanso para moitas persoas, de lecer, de praia, de actividades deportivas e tamén culturais...

O vindeiro mércores día 23, teremos na Casa da Cultura de Castro Ribeiras de Lea, en Lugo, unha nova representación de "O agasallo de Anya" adaptado como peza dramatúrxica con marionetas de diversas técnicas por Teatro Marionetas Trécola.

Se queredes ampliar a información podedes premer sobre o cartel que poño a continuación:


Non vos parece un bo plan? ;)

14 de xuño de 2017

Parabéns ao CEIP Monseivane

Hoxe quero felicitar, dar a miña máis sincera noraboa ás nenas e nenos do CEIP Monseivane de Vilalba cos que, arredor do día do Libro, pasei unha tarde fantástica.

Xa aquel día me ensinaron o periódico que estaban facendo para participar nun concurso que organizaba El Progreso e mesmo me fixeron unha entrevista para que formase parte del.
A min encantoume e penso que, aínda que non gañaran, xa tiña merecida a pena todo o traballo e aprendizaxes que fixeron grazas sobre todo ao inxente traballo que a súa mestra Irene desenvolveu con eles.

Pero... resulta que hoxe na prensa entérome de que son un dos colexios gañadores. Que gran alegría levei!!


PARABÉNS!!

E para que vexades que grandes xornalistas son, ofrézovos tamén a reportaxe que fixeron a raíz da miña visita ao seu colexio e que me fixeron chegar naqueles días do mes de abril. 

GRAZAS!!


11 de xuño de 2017

Asinando en Librería Amorín

O pasado venres estiven na Librería Amorín de Castro Ribeiras de Lea, foi unha tarde moi entretida que compartín con varias nenas e nenos que leron, ou están lendo, "O agasallo de Anya". Viñan moi ilusionados co seu exemplar para poder gardalo asinado por min.


Houbo tempo para asinar, tomar algún bombón e, sobre todo, para conversar con María e ver como animaba a ler ás persoas que se achegaron aquela tarde á súa librería. 
Para min foi moi agradable estar entre tantos libros e dedicarlles "O agasallo de Anya" a Unai, María, Hugo, Alexia, Cristina, Laura, Sandra, Alessandro, Hugo-Bryan... e algún que outro máis dos que non lembro o nome, pero si a súa cariña de ilusión. 




 Grazas!!!

28 de maio de 2017

IES de Monterroso

Hai un par de días tiven un encontro moi especial. Desta volta tocoume xogar na casa ;)

O alumnado de 2ºESO do Club de Lectura do IES de Monterroso, tras ler "O agasallo de Anya" no seu instituto, visitaron o da Pontenova para realizar un intercambio entre a Ulloa e a Mariña. Participaron en numerosas actividades lúdicas, deportivas e tamén culturais. Unha delas consistiu nun encontro comigo na Biblioteca do noso centro. Alí os recibín e alí mesmo falamos de Xiana, Anya, a vida en Ucraína, os proxectos solidarios, as súas inquedanzas, curiosidades, as miñas... 

Foi un novo encontro sumamente gratificante para min e do que non teño moitas fotos, pero si un gran recordo gravado, para sempre, na miña memoria. 




GRAZAS!!